新一年要過肥年？啋！聖誕嗰期經過怒食、喪食、勁食同係咁食食食食食之後，已經肥L咗好多！新一年你仲想我再肥啲？！咁Mean娜仲使出嚟行嘅？！2016年首要目標當然係減肥吧？不過～食埋呢餐炸髀薯條再講啦，正所謂唔食又邊有力氣減肥呢？（好似係）

有冇人覺得以上呢個情況同對白，好似無限輪迴咗2046次？明知道炸髀薯條、火腩、汽水、芝士呢啲嘢勁肥，但就係忍唔到口，一次又一次咁催眠自己︰食埋呢次就減肥……結果到現在都係減唔到肥，仲係肥人一名。不過唔怕！因為外國有人研究到一種疑似幾work嘅忍口方法，就係「對住塊鏡食肥嘢」！

中央佛羅里達大學嘅行銷學教授Ata Jami進行咗一個實驗，佢搵咗185個學生入去兩間房內品嚐食物。一間房裡面有鏡，一間就冇鏡，而佢哋都必須喺兩間房內食兩樣同樣嘅食物，一樣食肥爆嘅朱古力蛋糕，另一樣就係健康嘅水果沙律。結果研究發現，大多數實驗者望住鏡入面嘅自己食朱古力蛋糕時，都會覺得蛋糕好似突然變得冇咁好食，但對住鏡食沙律又冇咩差別。

Jami分析，人會透過鏡去評估自己嘅外在，例如會唔會太肥或者太瘦等等，所以當見到鏡中嘅自己食肥嘢時，潛意識會有種罪惡感，覺得食物都變得冇咁好味。不過前提係你要認定你食嘅係「肥嘢」/「對你唔好嘅食物」，先會產生排斥感覺，如果係食健康食物，就唔會有呢種感覺。而且食嘅時候，唔可以有其他人陪你食，如果唔係就好易受影響。

另外，對住塊鏡食肥嘢其實只係令人覺得冇咁好胃口，而唔會令你變得唔鍾意食垃圾食物，但假如持之以恆，每次食肥嘢都會冇咗以前嘅喜悅，逐漸就會少啲食。

但係……阿教授……如果好似Mean娜咁，覺得食肥嘢嘅自己都好可愛，咁仲有冇咩方法可以忍口唔食零食呀……