八、九十年代的電視新聞主播，在某個台新聞部效力，一做就十年八載，甚至二十多年，尤其是「大台」的體育新聞主播，伍晃榮、尹錦輝，馮堅成，仲有伍家謙。

怕「如果當年咁咁咁」

有傳伍家謙離開大台為賺多個錢買樓，當時人話：「八卦雜誌講啫，唔關事，要買樓，可以做到嘅。」佢話離開電視台，都係想變，想寫本書，之後數了幾個打工仔轉工列舉的例牌原因，不過，最touching同似乎最有說服力的，還是「好怕自己年紀大咗之後回望，如果當年咁咁咁，而家就咁咁咁嘞，我好怕呢樣嘢會出現！」家謙的太太目前在工餘時間在港大修讀MBA，兩年後畢業，「到時如果有小朋友，要供書教學，要供樓，未必有勇氣或有機會走。」

就係鐘意體育

伍家謙畢業於珠海學院新聞系，讀Year 2已到《新報》做體育記者，後來亞視 ，亦係「報體育」，及後無線設立24小時新聞台，都離不開體育。在「大台」新聞部多年不捨得離開，佢話自己真係鐘意體育，亦都視與體育相關的傳媒工作為志業。「見到與自己入行同期的香港運動員，喺本地及海外比賽有好成績，本地體育發展好咗，不自覺又打消離開的念頭，時間耐咗，開始有份使命感，始終身處香港最大的傳媒平台，好希望可以幫到佢哋（運動員）。」「後來發現，轉到其他平台一樣可以做得到。」你可能會質疑：嘩！有冇咁大理想抱負啊？但只要你身邊有朋友做體育記者，都不難發現這一類記者堅係like體育，唔係又點做十幾年，況且，不少文字或攝影體育記者的薪金都不算高，晉升速度亦較慢，熱情熱誠少啲啲啲都捱不住。

都係近年嘅伍家謙型仔啲（圖片來自伍家謙Facebook）

新鮮感好快冇

伍家謙離開電視台後，現時擔任香港設計中心的公關，亦為東方足球隊製作體育節目，近期也有出席腕錶品牌的宣傳活動，更在萬寧（Mannings）廣告演出，又到電台做節目，寫專欄，出路明顯比單單坐在公仔廂闊得多。不過，「公眾對你仲有新鮮感，但新鮮感不會長久，所以會多放時間在寫作，學習做PR。」「阿叔」林尚義當年既有講波，又有拍戲，我問家謙如果有人搵到客串電影角色（例如演新聞主播），佢即話：「唔抗拒！」但伍生形象咁正氣，唔過癮，唔好玩喎，用MenClub編輯部的搞鬼思維去想，一定要搵個索女角色引誘佢⋯⋯

放低主播角色，影相可以chok到盡（圖片來自伍家謙facebook）

萬寧廣告有伍家謙出現，真係估唔到

「你係唔係佢個仔」

伍家謙回憶任職大台多年，經常有人問他是否伍晃榮的親戚，「離職前仍有人問我係唔係伍晃榮個仔」。不過，據他所講，伍家謙的祖父姓名頭二字都是「伍晃」，而伍晃榮的兒子姓名頭二字，亦是「伍家」，巧合到呢！

一份稿寫6次

伍晃榮鏡頭面前好幽默，好似好nice，原來對新聞部「新豬豬」管教好嚴，伍家謙話：「佢惡㗎！會鬧人㗎！」有次他要寫一份關於網球的稿件，伍晃榮先後多次叫他「寫過！寫過！」，卻無講明更改重點，當家謙寫到第6次（前前後後已6小時）先過關，「當時好氣頂！改我啲稿好唔順氣 」幾日後，伍晃榮坦言此舉實屬小懲罰 ，因為他覺得對方有能力寫得更好。家謙話當時年少無知兼幼稚，心想「你係唔係妒忌我有才華啊！」，後來，人長大了，終於明白箇中目的，亦好感激對方教導。

後記

1.我最初都以為伍晃榮伍家謙是兩父子，亦很希望這是事實，這就是電視觀眾的變態心理（話咗佢哋係㗎啦！有乜理由咁橋兩個都姓伍！）

2.個人認為，伍家謙最有主播魅力，還是近年的事，連我這個對球賽零興趣的賽車迷，都會認真地聽他一字一句，難怪當傳出他要告別電視城，網民都非常不捨得。照咁睇，家謙而家走得最合時。