「成日睇完都唔記得名，所以都唔知J開邊個，同埋感覺依家好似冇以前咁多經典女優，咁多年都仲係波多野。以前又川島和津實又渡瀨晶，仲有小澤圓，都係令人印象深刻嘅名。話時話小澤圓呢個名唔錯，可以拎嚟做歌名，不如訪問出呢啲啦，好似仲精彩。」放心，我一定出，但要都係要講返正經嘢先。其實Yellow係點嚟呢？大家係咪以為佢哋嘅歌咸咸地，搞下黃色笑話咁，所以咪叫Yellow囉。我都以為係咁，但其實係同樂隊前身有關。

Yellow，野佬，前身其實係野仔，由於大家由仔夾band夾到變晒佬，於是Wilson就索性改埋名做野佬。「我哋都咁大個人，唔想再仔仔聲，係時候做佬，不過野佬聽落就好似有少少肉酸，不如型少少叫Yellow，個音又似。不過初時我哋都唔想被人知野佬呢個名，就咁叫Yellow先，等人討論下呢個『黃色革命』先，但始終敵唔過網民起底，所以就認返做野佬啦，哈哈。」Chris補充原來上網search「Yellow」係會中伏，因為實在搵唔到佢哋，所以不如叫返「Yellow野佬」好過。

Wilson︰「我哋都咁大個人，唔想再仔仔聲，係時候做佬。」

由仔變佬，大家都唔再年少輕狂，甚至要為頭家變得穩重，所以幾位成員都一邊全職打工，一邊夾band，事關香港搵食愈來愈難，想用音樂搵食就更難。主音小胡同結他手Wilson依家都係做時裝設計工作，佢兩個由大學時已經一齊夾band，後來大學band show就認識埋鼓手阿銘。「Chris就係我哋前輩，係搭車時讓關愛座畀佢時認識。講笑咋，其實都係夾band認識，大家覺得啱feel就走埋一齊。」Wilson話。

Bass手Chris其實係前壞碑唇成員︰「佢三個都係做Design相關工作，我本身就做唱片公司，又開始做下經理人，搞音樂活動咁。」阿銘就對Chris返工有啲意見︰「夾band約時間都係靠group chat，以前都係約大家放工夾，不過某人做咗經理人之後就好忙，時間就愈來愈難夾囉~~~~~~~~~~~~」全場斜睥Chris，仲話佢會一路夾一路做嘢講電話。咁忙都抽抽時間出嚟夾band真係好難得，你諗下家陣約齊人食餐飯都咁難，約到夾band實在係有heart先會成功。

Chris︰「創作冇太多規限同壓力，時間由自己決定會好free。」

「香港夾band係算難，所以劈頭想搵錢好難成功，為興趣行先會比較好。為興趣而夾，出發點唔係諗錢時嘅創作會自由好多，自己想點玩都得，唔會有人管住晒比較開心。就算有得再揀，我都寧願一路返工一路夾band，好過full time夾band。」見名銘講得咁認真，大家靜晒畀佢繼續講。「另一原因都係自己年紀唔細，豁出去齋夾band唔開飯，屋企都要食，失敗例子好多，制唔過。」Chris都話︰「我哋幾個都有份工，夾band心態係大家一齊玩，所以創作冇太多規限同壓力，時間由自己決定會好free。」

阿銘︰「就算有得再揀，我都寧願一路返工一路夾band。」

雖然夾band係難，但夾band多年嘅Wilson就話已經易過以前。「我覺得依家夾band係易過以前，以前我哋只可以出band show表演，介紹自己音樂，喺入面派下碟畀人聽，最多都叫人拎手指抄歌去聽。依家有上網，而且發表作品嘅渠道亦比以前多，容易接觸到群眾，甚至可以面向到世界，唔再限於香港嘅小群組。」

野佬受歡迎，正在佢夠貼身，創作內容都係圍繞住年輕人到中佬嘅生活同心態，半咸淡內容加上抵死歌名同MV，成功上位，《夫目前飯》更可以話係神作。其實外國都流行comedy rock組合，好似我本身就好鍾意The Lonely Island，而DJ Lubel、Ylvis同埋"Weird Al" Yankovic都係好好笑嘅音樂單位，反而香港係冇呢類風格嘅音樂，而野佬出現就滿足到樂迷對呢類風格音樂嘅需求，但小胡話佢哋其實都係做返自己。「最初就冇限住玩乜類型，因為唔同嘅音樂大家都鍾意聽，後來覺得不如試下做麻甩音樂，因為近年真係唔見有，以前許冠傑同陳小春嘅歌都會有呢啲味道，講下男人心聲，或者市井啲、地道啲嘅音樂。同埋都係做自己，因為我哋都係呢個年代，唱返自己同大家經歷嘅嘢。」

小胡︰「但我哋做歌係滿足自己，大家開心比出面接唔接受更重要。」

野佬嘅歌好笑得嚟亦好有共鳴，Chris又話野佬係屬於搞笑系先可以帶到呢啲歌畀大家。「因為我哋四個其實都係屬於搞笑系，無論我哋嘅歌做得幾深情都好，感覺都係搞笑，可能係大家見到我哋就已經覺得搞笑，所以不如開開心心。我哋又發現其他樂隊都唔搞笑，不如我哋就keep住搞笑，而且好多題材係我哋先會做，你唔會想像到Supper Moment去唱《著襪浸溫泉》，Dear Jane都唔會同你《夫目前飯》啦，係咪先？又或者佢哋都有包袱啦。」

講到歌曲風格，小胡就話野佬暫時都會繼續保持落去。「其實我哋歌又唔係玩到好另類，甚至我哋覺得聽落都係好pop，但都有人問我哋會唔會玩返流行曲，坤哥咁就好喇。但我哋做歌係滿足自己，大家開心比出面接唔接受更重要。」

雖然佢哋成日玩下，但其實野佬音樂好認真，好似最新作品《跟車太貼》就講網路現象，串得非常應棍。「今年目標做會做多啲歌，因為上年比較少，事關我哋好鍾意用一個填詞人，但佢冇咁多時間。希望之後會用多啲填詞人，不過要搵到好似我哋咁咸濕既填詞人，可能要花啲時間。」阿銘仲話有時會諗不如去讀返書，學多啲字自己填算數。」Wilson佢哋不如去網上搵人填詞，放demo上去叫大家填咸歌。「不如我哋放deom上menclub，叫大家填返首成men之路啦！有得諗喎，由boy變men，個MV就搵一個毒L突然變到勁靚仔，然後溝晒啲女，記得幫我地度度佢呀。可唔可以幫我哋搵埋波多野結衣一齊拍MV呀？4條佬8隻手一齊玩，諗起畫面已經好開心。」喂，成事不如預埋我啦。

野佬＠facebook

野佬@YouTube