NBA全明星週末將於2月舉行，目前除左正賽投票進行得如火如荼之外，其餘賽事嘅參賽者亦陸逐曝光，其中包括全明星入樽賽。

據消息指，聯盟邀請湖人中鋒Dwight Howard再一次參加今年嘅入樽賽，而佢亦意外地已經答應了，要知道34歲嘅Howard此前已經參加過3屆入樽賽，分別係2007、2008及2009年嘅賽事，當中2008年更加奪得冠軍，所以今次將會係佢生涯第4次參賽。

2007年首次參加入樽賽嘅Howard，最終未能夠進入決賽。而之後一年再次挑戰嘅佢，則以NBA入樽賽首次出現嘅超人造型登場，最終憑住一記超人式入樽(其實嚴格黎講唔算入樽，因為Howard根本無掂到個框)，最終奪得當屆冠軍。

如今相隔超過10年，Howard竟然再一次參加入樽賽，相信必定可以吸引唔少眼球注意。不過，如果講到吸引嘅話，有唔少球迷都希望已經42歲(入樽賽嘅時候已經43歲)嘅「半人半神」、「入樽代名詞」Vince Carter能夠再一次參賽，雖然呢個可能性好低，但絕大部份球迷都希望可以再睇一次呢位2000年入樽賽冠軍嘅最後一次起飛，我諗只要佢參加嘅話冠軍點都要送比佢。

2000年入樽賽可以話係NBA入樽賽歷史最精彩嘅一屆，因為Carter嘅各個入樽完全係震撼當時整個NBA，係可以令一眾NBA球星都目定口呆嘅入樽。雖然其後Zach LaVine及Aaron Gordon嘅對決亦都相當精彩，但始終2000年Carter嘅表現看似難以被超越。