{ SKIP }
文:MenClub 玄火  
POSTED ON 20 Feb 2020

世界上沒有免費午餐,跟住球星入場的英超球僮,原來是要錢,而且唔係球會畀錢球僮,而係球僮(父母)畀錢球會。今季價目表出爐,最貴的盛惠每位700鎊,約為7000港元,值唔值見仁見智。不過,如果父母想圓仔女或者自己嘅好夢,睇怕都會乖乖課金。

入場球僮本有薪火相傳的寓意,但是商業足球金錢掛帥,搵到錢的地方自然要賺到盡。今季收費最高的是鎚仔幫韋斯咸,A級賽事每位索價700鎊,大嗱嗱7000蚊港紙淨係拖住手行段路影張相,非常狼死,唔怪得球迷組織上周公開批評球會「吸血」,有損形象。

鎚仔幫成績唔係好,目前陷入護級漩渦,仲要收得咁貴,你可能會覺得唔合理,但係原來唔少英超中小型球會都係收差不多價錢,榜尾的諾域治每個球僮均價379鎊,但指定同隊長行,即係排隊頭入場的話,就要500鎊;升班馬阿士東維拉在A級比賽都收500鎊,但會把其中一個球僮的費用,捐給慈善機構,算係做返些少公關。

或許同面子有關,球會規模愈大,球僮收費愈低,如阿仙奴、曼聯、曼城、車路士和利物浦甚至願意免費,而紐卡素和修咸頓亦非常大方,並多數指定從會員中抽出幸運兒。不過,Big 6之一熱刺貫徹班主孤寒財主的做法,收費由350鎊到485鎊不等,但提供數個免費名額給兒童會員。

其他球隊方面,主要是由235鎊到450鎊之間,屈福特美其名是在會員中抽籤,但會建議球僮捐出100鎊給球會的慈善基金。較令人意外的是,神奇球隊狼隊在重要大賽都收費每位450鎊,最便宜要320鎊。當然,部份收費會包含入場門票,也會贈送波衫或其他紀念品,另有球會提供「自選喜愛球員」的服務。

同一個英國,蘇超雖然會向入場球僮收費,但大都是象徵式費用(最貴是咸美頓收每位180鎊),龍頭些路迪向會員收取20鎊,年齡範圍是4至14歲,而格拉斯哥流浪則屬分毫不收,但只讓季票持有者參與抽籤。別以為球會就逢旨市儈,西甲球會的球僮一律不收費,唯一可能的付費項目是球僮想與球星影張全家福合照留為紀念,就要像主題公園一樣畀多少少,對比英超已經闊佬得多。

網紅Jake Paul 及Logan 兄弟近年醉心打拳,更多次於不同賽事與名人、球星、前拳手較量,每次都吸引到大量注金同最重要嘅資金。而Jake Paul今日就宣佈,將於7月20日與前世界重量級拳王Mike Tyson進行表演賽,而且賽事 ...
sports
【網紅】Jake Paul七月擂台戰泰臣 Netflix有得睇
08 Mar 2024
球證應該點樣界定畀黃定藍牌呢?
sports
【足球】傳球壇將引入「藍牌」制度 被罰球員需離場10分鐘
09 Feb 2024