{ SKIP }
文:MenClub 魏文青  
POSTED ON 27 Jun 2022

雖然話奧運係全球矚目嘅大型運動賽事之一,但喺芸芸眾多奧運項目之中,總有啲係大家冇乜聽過、又冇咩興趣睇。好似「現代五項」咁,佢嗰「五項」究竟係邊五項都唔係人人數得出。不過去到2028年洛杉磯奧運,現代五項中或者會加入一個大家一定睇過嘅項目——當年大台譯做《力王爭霸戰》、外國叫做《Ninja Warrior》嘅障礙賽!

如果你唔記得《力王爭霸戰》係咩黎,可以睇睇森本裕介於2015年完成四個階段「完全制霸」嘅片段

而如果你年紀有返咁上下,應該會記得呢位長野誠船長,佢由2001年嘅第七回《SASUKE》就開始參加,一直到2016年第32回以44歲之齡引退。其中於2006年舉行嘅第17回中達成「完全制霸」,係史上第二個達到此成績嘅參加者。

香港人熟知嘅《力王爭霸戰》,原本其實係日本TBS節目《筋肉番付 (港譯:筋肉擂台)》嘅特別環節《SASUKE》,後來因為太受歡迎而成為獨立節目。TBS亦有將《SASUKE》嘅版權賣畀其他國家嘅電視台,其中美國版就係叫《American Ninja Warrior》。

《SASUKE》係一個大型障礙賽,通常會分為四個階段,每個階段又分為多項對體能有極高要求嘅挑戰,參加者要完成所有挑戰先可以晉身下一階段,完成四個階段 (最後一段通常係徒手爬上一個高塔)就能夠獲得獎金。由於難度極高,所以即使舉辦多年,能夠完成整個賽事嘅人都係寥寥可數。

順帶一提,日本目前只有四個人可以「完全制霸」,目前最後一個就係2015年嘅森本裕介

圖片:TBS

而據美國《Deadline》報導,國際現代五項總會 (UIPM) 以及國際障礙賽協會 (FISO) 正與TBS合作,研究以《SASUKE》替換現代五項中嘅馬術障礙賽 (另外四項係劍擊、射擊、跑步及游水),一方面當然係想靠《SASUKE》於全球嘅人氣黎拉高收視,另外亦因為現代五項選手並非專攻馬術,所以馬術障礙賽中經常出現撞欄、拒跳甚至墜馬嘅情況,令觀看性大減。

據知UIPM及FISO會於剛剛喺土耳其完結嘅現代五項世界杯之後,立即舉行一場試驗賽,睇下以《SASUKE》取代馬術障礙賽嘅可行性。而如果一切順利,最快於2028洛杉磯奧運上就可以見到新版現代五項,唔知大家又會唔會期待一下?

資料來源:Deadline
尼馬預計即將離隊!
sports
【足球】尼馬將被巴黎趕走,唔知會碌去邊呢?
29 Jun 2022
亦即係話勇士來季陣容必定改頭換面
sports
【NBA】勇士如留下全部總冠軍成員需繳付4.75億美元巨額!
23 Jun 2022