早前Tesla創辦人兼CEO Elon Musk喺Twitter上指出，將考慮以每股420美元作價私有化Tesla，並指出已有投資者支持。正當大家猜測緊投資者係邊個嘅時候，《Bloomberg》引述消息指出，沙特主權基金正與Tesla進行談判，並有機會成為Tesla私有化項目嘅主要投資者。

據報道指出，Tesla考慮以每股420美元作價私有化，整個私有化項目需動用約720億美元資金，而目前擁有Tesla 5%股份嘅沙特主權基金(PIF)正考慮參與項目投資，但報道並無具體說明投資細節。另有消息指，喺美國華爾街無銀行願意借錢支持Tesla，因為Tesla創立以嚟都未賺過錢，而且每季都燒緊約10億美元，睇嚟沙特金主係Tesla私有化嘅唯一希望。

Elon Musk喺Twitter上發出私有化消息亦引起市場人士反彈，由於Tesla聲稱以高溢價嘅每股420美元作價私有化，令沽空Tesla嘅投資者損失數百萬美元，其中兩人已經向法院提告。而美國證券管理委員會亦都聯絡咗Tesla，要調查Elon Musk點解以Twitter發布私有化消息，而非正常申報渠道。