相信大家唔多唔少都聽過AR(擴充實景)技術，最廣為人熟悉嘅就係手機遊戲《Pokemon Go》。不過今次旅遊事務署呈獻聯同香港設計中心就搞咗個城市旅遊項目「設計#香港地」，而其中嘅「#dd委約作品」就用上咗AR技術融入舊香港回憶，於10個灣仔區地點設立AR立體形像及場景。

相信唔少人去街、返工都會去過灣仔區，但你哋又熟唔熟悉灣仔嘅歷史文化呢？嚟自日本嘅新媒體大師藤幡正樹負責項目嘅「#dd委約作品」，當中有10個採用AR技術嘅作品「HKACT! Act 1 BeHere」，藤幡正樹以多位香港著名攝影師及收藏家，和地區老居民口述歷史為靈感，以70部相連嘅攝影機拍攝，透過AR技術將40至70年代的多個場景呈現，當中結合咗舊香港回憶及科技。

由12月1日起至明年4月30日，公眾可以喺灣仔區10個BeHere站點搵到AR立體形像及場景，每個站點將會有3至6個立體形像可供選擇，例如將大排檔、街頭理髮等昔日香港生活畫面立體化，而地點包括藍屋、石水渠街花園、灣仔峽道遊樂場、舊灣仔郵政局、利東街、大王東街休憩處、聯發街休憩處、光明街兒童遊樂場、日街及東美花園。