加拿大天文科學家最近由天文望遠鏡發現嚟自15億光年太空深處嘅無線電訊號，由於該訊號嚟自同一個源頭，而且不斷爆發傳送，似乎係向地球傳達緊訊息。今次科學家偵測到嘅無線電訊號名為Fast radio bursts(又稱FRBs)，係一種肉眼睇唔到，只維持數毫秒嘅閃光，而今次係人類歷史上第二次發現FRBs。

嚟自加拿大University of British Columbia嘅天文科學家，早前透過天文望遠鏡接收到重複嘅FRBs，並推測訊號嚟自距離地球15億光年外嘅地方，估計係由外星生物所傳送。天文科學家指出，相信訊號嚟自同一來源，而且喺短短三星期內發現咗約13次嘅FRB，不過佢哋表示今次唔係個別事件，喺太空或會有更多同類型嘅電波訊號。

過去人類首次偵測到FRBs係於2007年，但由於呢啲神秘電波存喺太空各處，天文學家仍然唔清楚佢哋嘅形成原因。而今次偵測到FRBs嘅天文望遠鏡CHIME位於加拿大British Columbia，佢由四個100米長嘅半圓柱形接收器組成，每日都會掃描整個北半球上空。今次嘅研究報告喺1月9日於《Nature》期刊上發表。

來源：BBC