好多人以為做黑客要用到超級電腦，或者係高階配置電腦，不過 NASA (美國太空總署)話你知唔係！日前 NASA 公開一份報告指，噴射推進實驗室 (JPL)電腦系統去年4月遭到黑客入侵，並偷取咗多份文件。其實 NASA 咁國際嘅機構被黑客入侵已經值得關注，但原來黑客所用嘅電腦更值得關注，因為 JPL 係被一部僅售35美元嘅迷你電腦所入侵。

據 NASA 報告指出，黑客所使用嘅電腦係一部由英國 Raspberry Pi 基金會開發，名為 Raspberry Pi 嘅一體式單晶片電腦，佢採用 Linux 作業系統，只有一張信用卡咁大，一般用作建立智能家居及結合至機械人等。由於 Raspberry Pi 售價只係$36美元，即約$280.8港元，所以普通人都好容易買得到。

今次黑客成功利用 Raspberry Pi 入侵 JPL，而入侵時間持續連線咗10個月咁耐，期間合共偷取咗23個共 500MB 存量檔案，包括國際武器貿易條例 (ITAR)，及「火星科學實驗室」任務資料，但入侵事件喺一年後先被 NASA 所揭發。NASA 考慮到黑客有機會入侵太空任務系統，甚至向正在執行任務太空人發送惡意訊息，所以決定暫時切斷內部網絡。

來源：The Next Web