噚日 Lenovo 喺香港發布咗兩部新推出嘅電競筆記型電腦 Y7000 SE 及 Y740，其中 Y7000 SE 係 Lenovo 嘅全新產品，採用紅色背光 Keyboard 設計，及於機背設有LED背光「Y」字 Logo，最高可以搭載第9代 Intel i7 處理器，及32 GB RAM。而另一型號  Y740 為系列更新，同樣最高搭載第9代 Intel i7 處理器，分別備有15吋及17吋型號。

發展電競市場可以話係大勢所趨，所以近年中國電腦品牌 Lenovo 都推出咗電競產品系列 LEGION，而日前 Lenovo 喺香港發布嘅就係 LEGION 系列其中兩款電競筆記型電腦 Y7000 SE 及 Y740。Y7000 SE 外型以黑色機身配襯紅色燈光，富有電競感。另外，Y7000 SE 螢幕採用 15.6吋全高清(1920 x 1080) IPS，配以三面窄邊框螢幕設計，以筆電嚟講視覺效果不俗。

硬件方面，Y7000 SE 最高搭載第9代 Intel Core i7-9750H處理器、32 GB DDR4 RAM、512 GB SSD + 1 TB HDD，以及最高搭載 NVIDIA GeForce RTX 2060 顯示卡，以上規格令 Y7000 SE 能夠應付到遊戲之餘，仲可以處理用家日常拍片剪片嘅需要。不過呢部始終係一部電競筆電，所以重量都有2.3 KG，尺寸為360mm x 267 mm x 23.9-25.9mm。Y7000 SE 售價由$13,998起，目前已經推出。

同場 Lenovo 仲介紹咗另一部電競筆記型電腦 Y740，呢部機嘅定位傾向為介乎遊戲及工作之間，所以可以睇到佢嘅燈光及外型設計都無 Y7000 SE 咁具電競感。Y740 同樣採用三面窄邊框螢幕設計，不過佢就提供15吋及17吋兩個型號選擇，同樣為全高清(1920 x 1080)螢幕，但15吋螢幕亮度高達 500 nits，而17吋螢幕亮度則高達 300 nits。

Y740 雖然以遊戲及工作之間為定位，但硬件一啲都唔輸蝕 Y7000 SE。佢同樣最高搭載第9代 Intel Core i7-9750H處理器、32 GB DDR4 RAM，15吋版本最高搭載1 TB PCIe NVMe 及 NVIDIA GeForce RTX 2070 Max-Q 顯示卡；而17吋版本最高搭載2 TB HDD 及 NVIDIA GeForce RTX 2080 Max-Q 顯示卡。Y740 售價由$18,349起，目前亦已經推出。