日前英國50鎊新鈔票肖像人物揭曉，英國二次大戰解密英雄、數學家及 A.I. 之父 Alan Turing 肖像將出現於鈔票上。Alan Turing 所發明嘅電動機係現代電腦嘅前身，並於第二次世界大戰期間成功破解德國 U型潛艦所加密嘅訊息，被公認為縮短二次大戰功臣。

相信唔少人睇過由飾演 Dr. Strange 嘅男神 Benedict Cumberbatch 主演嘅《The Imitation Game (解碼遊戲)》嘅讀者，都唔多唔少對呢位英國二戰解密英雄 Alan Turing 有所認識，事實上 Alan 係一位傑出數學家，同時係電腦科學及 A.I. 之父，成就深深影響現今社會。

喺二次大戰期間，Alan Turing 於解碼中心 Bletchley Park 研究破解納粹德軍的密碼系統「Enigma」，當時由 Alan 帶領嘅團隊每日破解約3000份德國軍事通訊，令二戰縮短咗多達兩年時間，因為相關任務為高度機密，佢嘅事跡直到1970年先至對外曝光，成為二戰無名英雄。

雖然 Alan Turing 係二戰嘅無名英雄，但佢因為喺1952年與同性發生性關係，被控「嚴重猥褻」罪，佢不但遭到撤職，定罪後佢喺入獄與化學閹割 (注射雌性荷爾蒙)之間選擇咗後者。至1954年6月7日，Alan 靈懷疑不堪受壓而服毒自殺，結束短暫一生。

大家平常所見到嘅英鎊鈔票正面都係英女王伊利莎白二世頭像，而背面則印有各種唔同領域著名英國人物。去年英國央行總裁 Mark Carney 宣布，新版50英鎊鈔票頭像將紀念喺英國科學領域有貢獻人物，而 Alan Turing 由22萬多個提名人物中脫穎而出，其餘人選包括去年3月逝世嘅知名物理學家Stephen Hawking、女科學家 Rosalind Franklin 等。

Alan Turing 版嘅新50鎊鈔票將會喺2021年發行，而鈔票上嘅肖像採用於收藏喺英國國家肖像館、攝於1951年嘅 Alan Turing 相片。

來源：Daily Mail