Elon Musk 旗下太空科技公司 SpaceX 嘅載人太空計劃要推遲至明年喇，因為今年4月嘅 SpaceX 載人太空艙「Crew Dragon (龍飛船)」發生爆炸，經調查後發現太空艙意外因發射中止系統閥門意外洩露引起，即係話 SpaceX 需要對載人太空艙進行設計更改，所以載人太空計劃需要推遲至2020年。

今年4月20日，太空科技公司 SpaceX 旗下載人太空艙「Crew Dragon」於佛羅里達州空軍基地測試期間發生爆炸，並完全毀壞。而日前，SpaceX 副總裁 Hans Koenigsmann 表示與記者於電話會議上指出，SpaceX 調查人員發現太空艙爆炸原因要追溯至火箭發動機推進器系統內嘅高壓閥門，而推進器系統設計目的係喺緊急情況下，能夠迅速將機組模塊由火箭上射出。Hans Koenigsmann 續指，太空艙高壓閥門洩漏組件允許液體氧化劑進入高壓管，然後高速通過鈦止回閥漏出而導致爆炸。

早前，SpaceX 計劃於今年年底前於國際太空站進行兩次測試任務，當中包括咗載人太空計劃，而目前計劃要推遲至2020年。SpaceX 副總裁 Hans Koenigsmann 指，今年 SpaceX 要攜帶太空人升空已經變得越嚟越困難。而今次載人太空計劃推遲對 NASA 嘅商業太空人計劃嚟講係一次挫敗，因為多年嚟美國一直依賴俄羅斯火箭及載人太空船將美國太空員送到國際太空站。

來源：Bloomberg