黎緊11月就係美國總統大選，經過上次大選後有傳俄羅斯利用社交網站影響選情，美國大眾對Facebook、Twitter會否對平台內容作出審查非常關注。Facebook最新就公佈「官媒標籤」等用家更明確地了解社交網站上的新聞媒體背景。

簡單啲講呢，「官媒」即係由某國政府部份或全面控制嘅媒體，咁作為喉舌，除咗報新聞之外，當然亦係國家嘅宣傳機器，而Facebook推出呢個「官媒標籤」，就係話畀讀者知呢個媒體係某國宣傳機器嘅一部份，咁佢講嘅嘢你信唔信，就自己決定啦。Facebook的網絡安全政策主管Nathaniel Gleicher於blog貼文中指會以資金來源、管理人選、編採機制及獨立性等因素決定是否官媒。

咁一直講緊嘅「某國官媒」，究竟又係邊國邊啲媒呢？據《Variety》報導，「獲得」官媒標籤嘅，有中國政府控制嘅新華社及央視，另外俄羅斯控制的Sputnik及RT、以及伊朗國營電視台亦在名單之中。如果被標籤嘅媒體唔同意，可以向Facebook提出上訴。另外Facebook亦會停止各國官媒於美國Facebook落廣告，但喺其他地方落廣告就不受限。