依家大家要聽歌，喺街可能係用串流App、喺屋企可能係用Youtube，但你又記唔記得當年拎住Mp3機出街、返到屋開Winamp嘅年代？你又會唔會有啲掛住當年要下載 (咳嗯) Mp3落黎慢慢聽、慢慢砌自己個Playlist嘅美好時光？如果你係啲咁嘅人，咁就要睇下呢個網上嘅Winamp博物館啦！

呢個Winamp博物館係由Facebook工程師Jordan Eldredge製作，佢拎咗Internet Archive上收藏嘅超過65,000個Winamp Skin，並設立「Skins.Webamp.org」網站，入面列哂呢幾萬個Skin出黎，有最傳統嘅Default Skin，又有其他用家用無數心機時間自己設計出黎嘅遊戲主題、歌手主題、藝術主題。最難得嘅係唔單止可以睇，Click入去仲每一個都真係可以播歌，你甚至可以匯入自己收藏嘅音訊檔案入去慢慢聽，重溫一下當年聽歌嘅味道。

值得一提嘅係Jordan Eldredge目前仍持續收集不同Skin去擴充整個系列，所以如果你仲有Keep住當年自己精心設計嘅Winamp Skin，不妨去網站提交，為保留呢個集體回憶出一分力。