美國食品藥品監督管理局 (FDA)於上週五正式批准由輝瑞 (Pfizer)及BioNTech研發嘅肺炎疫苗作緊急使用，亦係美國當局首款批准使用嘅肺炎疫苗。

圖片：Reuters

所謂「輝瑞/BioNTech疫苗」，係由德國BioNTech研發、輝瑞製造嘅肺炎疫苗，亦係早前第一款公佈研發成功嘅疫苗。FDA批准輝瑞/BioNTech疫苗作「緊急使用」，代表當局認為情況緊急而冇其他可行方法，所以跳過本來可能要用一年時間嘅審視程序，令疫苗能夠儘快被使用。據報美國目前只准16歲或以上人士接種疫苗，其中醫護人員及居住於長期照顧中心嘅人士將會優先接種，然後就應該會係老年人及長期病患者。最樂觀估計下，大約3到4月就會開始為一般人士接種。

示意圖

雖然輝瑞/BioNTech疫苗嘅數據顯示能夠有效抵抗肺炎，但其最大「致命傷」係疫苗必須儲存於-70度之中，令長途、大量運輸變得非常困難，一般診所亦好有可能冇相關工具用作儲存，所以就算生產趕得切，都難以於短時間內作全球性接種。