要數吸塵機，Dyson相信都唔係唔少人嘅首選，而品牌最新就推出兩款新無線吸塵機，分別為採用輕量化設計嘅「Dyson Micro 1.5kg」以及個頭識轉彎嘅Dyson Omni-glide，話好適合香港人嘅蝸居喎。

先講「Dyson Micro 1.5kg」，顧名思義，佢就係一部僅重1.5kg嘅吸塵機，亦係品牌有史以來最輕嘅吸塵機，其輕量化係透過改良核心技術，即係Hyperdymium™摩打、鋰離子電池、渦旋式氣旋組等而成，品牌就話無犧牲到吸力及過濾能力。另外Micro 1.5kg配備新嘅「極輕量軟絨毛滾筒吸頭」，主要分別就係體積細咗好多，更容易隊入哟窿窿罅罅到做清潔。

而講到「窿窿罅罅」，就要提另一新款「Omni-glide」。「Omni-glide」嘅外表與品牌其他型號分別較大，另如個開關就唔再係板機式設計，而係處於手柄之上，令吸塵機整體更接近一碌棍嘅型態。而咁設計嘅原因，就係令Omni-Glide能夠水平貼於地面，更方便清潔梳化底、床下底之類嘅位置。另外個吸頭亦換成全新設計、可以360度轉、又可以360度滑嘅「多向軟絨毛滾筒吸頭」，同樣係迎合香港地啲又細又岩巉嘅單位設計。

Dyson Micro 1.5kg有尺寸為 222 x 207 x 1107mm (闊X深X高)、有銀灰色 (HK$3,380) 及金色 (HK$3,680) 可供選擇；Dyson Omni-glide尺寸則係208 x 92 x 1077mm，有紫色 (J SELECT獨家發售，HK$3,580) 及 金色 (HK$3,780)兩隻色。特別值得一提嘅係，兩個新款續航力都係20分鐘，比起品牌其他吸塵機要短。

資料來源：Dyson