隨住科技發達，唔少大企業都會採用人工智能技術分析數據，辨識人或事物。不過最近Facebook就因為AI系統誤將黑人影片分類成「靈長目動物（primates）」而捲入種族歧視風波，事後火速關閉相關功能並發聲明道歉。

Facebook主題建議功能將黑人影片分類成「靈長目動物（primates）」。（圖片截自：紐約時報）

據《紐約時報》報導，最近有FB用戶觀看一條黑人與白人以及警方嘅爭執影片，即使片內一隻馬騮、黑猩猩、大猩猩都冇，但FB突然彈出建議詢問用戶「繼續觀看有關於靈長目影片？」，隨即引嚟爭議。事後Facebook發言人承認係AI系統出錯所致，並強調今次係一個絕對唔能夠接受嘅錯誤，表示已關閉相關功能並調查出錯原因，向有所被冒犯嘅人道歉。

Google Photos App曾經誤將黑人照片分類成「大猩猩（gorilla）」。（圖片截自：dailymai）

事實上，AI辨識技術出錯導致尷尬嘅情況唔係第一次發生。2015年Google Photos App就曾經誤將黑人照片標籤為大猩猩，事後Google除咗立刻道歉，更將「大猩猩（gorilla）」、「黑猩猩（chimpanzee）」、「猴子（monkey）」等分類標籤封鎖至今。