最近美國一位善於改造及發明嘅工程師YouTuber，因收到醫院$69,210美元高額帳單後忽發奇想，決定自己買材料製作一部小型X光機，經過一番努力後，結果用咗唔夠1,000美元就可以照X光。

日前YouTuber William Osman收到醫院一張$69,210美元高額帳單，但多得有買醫療保險，最後只需要畀$2,491美元，不過佢仍然覺得醫療費太貴，所以萌生自製X光機嘅諗法。於是佢就開始上網搵資料，並喺eBay買咗個牙科用X光機（$155美元）、60,000V電壓火牛（$400美元）、一卷鉛板以及多個Geiger-Müller counter（用作測量輻射讀數）。

土炮X光機完成圖。

買齊材料之後，William Osman開始組裝出一部土炮X光裝置，並身先士卒影咗張手部X光片，雖然成像效果同醫院嘅X光機仲有一大段距離，但都可以清楚見到手指嘅骨骼。

有趣嘅係，William Osman老婆知道老公要自製X光機後，就顯得非常擔心同覺得好危險，不過William Osman就好似一個大細路，非常興奮咁講解製作過程，並對自己嘅「發明」非常有成功感。

William Osman老婆一直顯得非常擔心。