偷拍於日本可以話係非常常見嘅犯罪行為——當然唔係講緊喺條街到偷影對面行過個靚女嗰種，而係去影人裙底、甚至於公共廁所裝針孔攝錄機偷拍如廁呢啲變態行為。而京都警方就決定使用Youtube廣告黎警告潛在犯人，但個方法就引黎日本網民批評。

「のぞき見」などの検索履歴、警察が広告配信https://t.co/tARsDiF29B
京都府警が盗撮をやめるよう呼び掛ける広告を「YouTube」などに配信しています。対象は「のぞき見」「小型カメラ」などのワードをGoogleで検索した履歴のある、府内の18歳以上の男性。

— 毎日新聞 (@mainichi) October 21, 2021

京都警方早前公佈，截止今年九月，佢哋已經發生咗112宗盜攝罪案，比起去年全年87宗多近25%，所以佢哋推出咗一條長6秒、唔可以Skip嘅Youtube廣告，當中嘅訊息簡短而有力，就係話「盜攝係犯罪！有人望住你架！」

就咁睇呢個廣告似乎冇咩問題，但原來唔係每個人都睇到呢到廣告。據京都警方指，只有府內18歲以上、曾經搜尋過「覗き見 (偷窺)」及「小型カメラ (小型攝錄機)」嘅男性先會見到。換言之係有意針對 (京都警方認為嘅) 潛在犯人。

圖片：每日新聞

但消息一公開，日本網民對呢個方法就頗有微言。首先呢個針對搜尋關鍵字而推送廣告嘅模式，就算唔係一個盜攝警告都已經令唔少人反感，京都警方以「偷窺」用家嘅搜尋紀錄黎「打擊偷窺」罪案嘅手法亦充滿諷刺性；另一方面，搜尋過呢兩個關鍵字嘅人亦唔一定係潛在嘅盜攝罪犯，咁做加深網民對於政府機關監控，亦有人指出呢個警告同大家「某啲片」一開頭嘅FBI警告一樣，根本就冇人會理。