曾經移植及重製過N次嘅《生化危機4》，早幾日終於出埋VR版啦，等機迷可以用全新嘅方式再再再度體驗經典之作，而且評價都算唔錯。之但係呢，最近有女玩家就反映遊戲有設計缺陷，每次用手榴彈或刀仔嗰陣都會打到自己心口，結果撞到瘀晒。

由於《生化危機4 VR》分別將刀仔及手榴彈設定喺左右兩邊心口，玩家們只要當心口真係掛咗件實物，伸隻手埋去「拎」出嚟就用得，但開發人員似乎忽略咗女性玩家嘅生理結構，搞到佢哋非常困擾。其中Reddit女網友「ElleannaTheBold」就表示，呢個設定令佢每次用刀仔或手榴彈嗰陣都會撞到個胸，結果玩到心口瘀晒，佢就建議官方可以加入一種身體形狀或尺寸嘅選項，等玩家可以按個人情況調整。

當ElleannaTheBold講出呢個「困擾」後，唔少女玩家都紛紛喺留言區表示自己都有同樣情況，唔通遊戲開發團隊入面一個女士都冇？