老任終於出新硬件！不過就唔係傳聞中嘅Switch 2，而係一款智能鬧鐘「Alarmo」，內置多款任天堂人氣遊戲音樂，能偵測用家動作播出特定音效，令大家起床變得更加有趣。

呢款名為「Nintendo Sound Clock Alarmo(下稱Alarmo)」嘅智能鬧鐘採用《Super Mario Bros.》主題風格設計，鐘面係一個2.8吋LCD屏幕，頂部設有一個發光旋轉按鈕，其最大特色在於能夠偵測用家起床動作並播出相應音效。當到達指時間後，Alarmo會播出用家事先選定嘅遊戲音樂，直至用家離開床後自動停止，然後播放一段過關歡呼音樂，無須手動熄鬧鐘。若然用家賴床遲遲唔起身，Alarmo就會發出Mario食金幣嘅音效，並且愈嚟愈大聲，嘈到用家肯起身為止。

Alarmo內置《超級瑪利歐 奧德賽》、《薩爾達傳說 王國之淚》、《斯普拉遁3》、《健身環大冒險》、《皮克敏4》5款遊戲主題、每款各有7首音樂，合共35首鬧鐘鈴聲可供用家選擇，而且未來仲會透過網絡更新追加《瑪利歐賽車 8 豪華版》及《集合啦！動物森友會》。除咗一般鬧鐘功能，Alarmo仲可以記錄低用家瞓覺時嘅翻身次數，以及播放舒緩音樂幫助用家入眠。

Nintendo Sound Clock Alarmo目前已於日本與北美地區任天堂官方線上商店，以及指定實體商店開賣（ Nintendo TOKYO/OSAKA/KYOTO ），售價為12,980日元（約675港元）。