「追夢」呢家嘢一般都被認為係年青人嘅專利，因為佢哋冇咩可以輸、就算輸咗都有大把時間慢慢賺返。但咁樣唔代表成年人甚至中年人就唔可以有夢想。好似日本就有個即使已經43歲，但仍然於偶像、寫真界努力嘅中女！

呢位名為「まりえ（43）」嘅43歲偶像，近日因為出席日本著名水著寫真活動「近代麻雀水著祭」而被日本媒體廣泛報導。據佢早前接受訪問時指，自己28歲於女僕咖啡打工時，因為受到客人一句「邊個都可以做到地下偶像」啟發，於是就真係開始佢嘅偶像生涯，而且仲好快站穩陣腳。

頭兩年佢為免嚇怕Fans，所以一直隱藏自己嘅真實年齡，但後來覺得一直暪黎暪去好難同Fans互動，加上咁啱踏入30大關，所以就於30歲生日時公開自己嘅年齡。結果Fans們唔介意之餘仲相當支持，於是佢就一直活動至今。有趣嘅係佢嘅歲數係偶像名嘅一部份，所以每年生日前一日佢都會舉行「解散直播」，並於正日舉行「生日直播」，宣佈以改咗歲數嘅新名出道。

做得偶像，外表方面當然要到達一定水平。「まりえ（43）」靚唔靚女、可唔可愛就見仁見智，但至少你去睇佢發佈於社交平台上嘅照片，又的確睇唔出佢已經係個四十路中女。甚至去睇返佢於「近代麻雀水著祭」接受訪問嘅片段，其真面目亦唔見得有幾與別不同。況且，大家諗下自己過咗30歲後行幾步樓梯都要喘氣（OK，我認係講緊我自己），而佢去到43歲都仲喺台上又唱又跳，淨係呢份體力活力，都值得大家尊敬啦下話？

IG：marimatu0627