自從美國對中國實施禁運包括半導體晶片等貨物後，中國科技公司就被逼開始自主研發，而且近年一直對外宣稱取得重大成果。不過近日有傳聞指出，華為最新開發嘅「AI加速器」中，竟然仲有使用台積電生產嘅晶片。華為及台積電就按各自立場否認相關傳聞。

事源係《Bloomberg》近日引述一名知情人士，指加拿大研究公司TechInsights深入調查華為推出嘅AI加速器時，發現當中有一塊叫「Ascend 910B」嘅晶片係由台積電生產。而據《Reuters》嘅後續報導，TechInsights發現後有主動通知台積電，而台積電知情後亦主動聯絡美國商務部。另外據《Financial Times》報導，台積電向商務部表示曾經有一個客人訂製過同「Ascend 910B」類似嘅晶片，而當時台積電有分別聯絡過商務部及呢位未公開嘅客人。

如果上述傳聞全部屬實，情況就應該係有人向台積電落單訂購「Ascend 910B」，台積電都覺得有啲可疑，於是主動聯絡商務部報定案，同時又調查過下呢位客人，但最後都係賣咗出去。結果呢批晶片就被用於華為「自主研發」嘅AI加速器之中。

當然，上述一切都只係傳聞同揣測。報導出街後，TechInsights拒絕回應係咪有做過調查、台積電就指自2020年美國實施禁令後就冇同華為合作，同時亦否認自己被商務部調查。華為方面就直接話自己根本無出過「Ascend 910B」呢塊晶片（所以唔使搵人整），而美國商務部則同樣未有回應。

資料來源：Bloomberg、Reuters、Financial Times