正如先前預告，Apple在昨晚正式推出搭載M4晶片嘅全新iMac，外觀延續上代設計，但處理速度就快咗2.1倍，並支援Apple Intelligence功能。

據官方介紹，搭載M4晶片嘅新款iMac效能大大躍升，日常工作效率比前代M1版本提升1.7倍，進行照片編輯和遊戲等繁重工作時，處理速度更快達2.1倍。加上更加大嘅神經網路引擎，能夠進一步增強Apple Intelligence相關應用，加快用戶完成工作的速度。其他規格方面，新款iMac RAM由16GB起跳，最高可升級至24GB，記憶體則照舊256GB起跳，最高可升級至2TB，並提供4個支援Thunderbolt 4嘅USB-C接口（較便宜嘅8核版本只有2個接口），能連接最多兩部6K外置螢幕。

雖然外觀設計不變，依舊採用24吋4.5K Retina螢幕，但Apple今次首次提供納米紋理玻璃升級選項，官方宣稱能大幅減少反光及眩光，同時保持出色嘅影像質素，適合使用環境反光較多嘅用家選擇。顏色方面同樣提供綠、黃、橙、粉紅、紫、藍及銀7種顏色可選，雖然Apple就話今次配色比前代更加「鮮亮清新」，不過從圖片就睇唔出有太大分別，或者要到門市睇實物先知。

除此之外，Magic Mouse、Magic Trackpad及Magic Keyboard等周邊配件亦全面由Lightning改為USB-C接口，不過Magic Mouse個接口仍然置於底部，依舊要翻轉成隻滑鼠先充到電...

新款iMac售價為HK$9,999(8核版)及HK$11,499(10核版)起，目前已開放預訂，11月8日正式發售。