睇住Bitcoin價值屢創新高，或者唔少人都會發夢「呀如果早十年我已經開始掘緊Bitcoin我依家就發囉」。而英國有個人，就真係於十年前就已經掘咗8000枚Bitcoin，依家總值約近8億美金——但問題係佢十年前一時錯手將個存有Bitcoin嘅硬碟掉咗去堆填區，多年來尋獲無果，近日更為咗保有繼續尋找嘅機會，打算向當地政府買起整個堆填區。

據現年39歲、來自英國嘅James Howells指，佢早於2009年就已經參與Bitcoin挖礦，並一度將近8000枚Bitcoin存放於安裝喺某個硬碟之中嘅電子錢包內。但就於2013年搬辦公室時，將包含電子錢包嘅硬碟誤認為另一個同款空白硬碟，所以將整個硬碟放入黑色膠袋，而佢當時嘅伴侶亦好順理成章地認為垃圾掉咗。

佢相信目前硬碟被埋於南威爾士地區嘅某個堆填區中，並自2013年起就不停嘗試遊說當地政府容許佢進內挖掘堆填區尋找硬碟，甚至提出假設搵得返會將部份Bitcoin贈予政府作利誘。但當地政府多年黎就以「關閉堆填區影響民眾生活」、「挖掘堆填區污染環境」等理由拒絕。事件更一度鬧上當地高等法院，直到上月James Howells被判敗訴。

而近日嘅最新消息，係當地政府認為堆填區已經滿載，所以有意將其永久封起及關閉，並將土地改為太陽能發電廠。對此James Howells表示並不意外，因為佢早幾年就知堆填區即將滿載，只係比佢想像中黎得快啲。而佢嘅應對方法，就係打算與投資者一同向當地政府提出收購整個堆填區以開始挖掘，同時佢亦提出會入人力、機械狗挖掘以減低污染，並會使用機械學習人工智能協助辨認出硬碟。對於其收購意向，當地政府拒絕回應。

資料來源：The Guardian、AOL