對男性黎講，能夠憑「一己之力」完成而又有效嘅避孕方法，目前只有使用安全套以及接受絕育手術兩種，而且都各有弊處。或者就係睇到呢個市場需求，所以近來有唔少人都分別研究緊適用於男性嘅避孕方法，繼早前介紹過嘅「磁力加熱蛋蛋避孕法」之外，最新提出嘅就有「聲波震蛋避孕法」。

卻說德國女設計師Rebecca Weiss一直都有服用賀爾蒙藥物作避孕之用，但由於早前佢出現子宮頸癌早期病變，必須停服賀爾蒙藥物，佢與先生就必須另尋避孕方法。結果佢哋就發現用於男性身上嘅有效避孕方法少之又少，於是Rebecca Weiss就決定自己整一個出黎，亦即係呢個名為COSO嘅產品。

COSO嘅原理相當簡單，基本上佢就係用大家洗眼鏡個超聲波類似，先於機器注入清水，機器會將水加熱至熱水浴嘅程度，然後男性就將自己嘅蛋蛋浸入去，機器再發出超聲波「震蛋」15分鐘，超聲波於體內產生熱力，繼而影響精子嘅活動及製造能力。據Rebecca Weiss指，只需要接受兩次療程，就能於兩個星期後見效，效果至少能夠持續2個月，並於6個月後完全回復正常。

圖片：COSO

當然，目前COSO只係屬於概念階段，距離成功研發、臨床實驗、以及獲得有關當局嘅批准及認可仍有至少幾年時間，但如果真係搞得掂，就會係一種無痛、無副作用、兼無侵入性嘅避孕方法。Rebecca Weiss估計，COSO嘅售價大概係HK$2,700至$4,500左右，到真正推出市場時亦會附送APP，以提醒用家及伴侶定期接受療程。