愛情令人沖昏頭腦，所以唔少騙子都會先作個故仔欺騙對方嘅感情，再欺騙埋佢嘅金錢。而一名65歲嘅日本女子，似乎就被愛情沖得特別昏，因為佢信咗一個點睇都好無稽嘅故仔：一個身處國際太空站嘅太空人想同佢結婚，而呀太空人需要錢先可以支付「回到地球嘅火箭費用」。

據日本傳媒報導，一名65歲嘅滋賀縣女子，早前透過IG認識一個自稱於國際太空站服役中，即係人在太空嘅俄羅斯太空人，而呀太空人隨即透過訊息向女子展開熱烈追求，仲曾經講出「就算我講1000次你都唔理，我都會繼續講：我愛你」呢啲韓劇都寫唔出嘅肉麻對白，結果成功冧掂女子，最後太空人提出，如果佢返到地球嘅話，就會去日本同女子結婚。

而問題就出喺「點返地球」呢壇嘢上面，因為據呀太空人講，佢返唔到黎地球嘅原因，係因為佢冇錢畀「回程火箭費用」，而且火箭「直飛」日本亦需要額外收費，所以就向女子索取金錢。而女子亦不疑有詐地，先後5次將總數440萬Yen (約HK$24萬)轉帳予太空人，最後因為太空人繼續索取金錢，先令女子產生懷疑並報警，最後揭發自己被騙。

資料來源：FNN