西班牙名將卡斯拿斯除咗好波、靚仔之外，佢仲曾經同西班牙靚女體育主持Sara Carbonero Arévalo組成球壇金童玉女。不過日前卡斯拿斯嘅Twitter就突然「認Gay」宣佈出櫃，仲意外釣出另一西班牙名宿佩奧爾「認愛」，最後事件以卡斯拿斯澄清Twitter被Hack，並道歉了事。

圖片：網上圖片

卻說西班牙週日中午時份，卡斯拿斯嘅Twitter突然發文指「希望大家尊重：我係同性戀者」。卡斯拿斯去年剛與靚女老婆Sara宣佈分居，而西班牙傳媒近來就不停猜測佢嘅新女友究竟係邊個，有人估係西班牙演員Alejandra Onieva，又有人話佢搭上另一西班牙名將碧基嘅前女友Shakira，所以呢個「出櫃」宣言瞬間引起網民注意。而令事情更亂嘅，係另一西班牙名宿佩奧爾竟然於「出櫃宣言」下留言：「係時候將我哋嘅故事講出黎啦，Iker」，令事件進一步升溫。

Cuenta hackeada. Por suerte todo en orden. Disculpas a todos mis followers. Y por supuesto, más disculpas a la comunidad LGTB. ????

— Iker Casillas (@IkerCasillas) October 9, 2022

不過卡期拿斯後來就於Twitter澄清自己係被黑客入侵，並向自己嘅Fans以及LGTB族群道歉，而出櫃宣言 (連埋佩奧爾嘅留言)亦已經刪除。

其實自卡斯拿斯嘅帖文一出，就有人估計佢係因為不勝緋聞之煩，所以用「出櫃」作出嘲諷，而佩奧爾似乎亦係知情者，所以先會留言幫手「反串」。不過可以想像，如果LBGT族群發現有人拎「出櫃」黎講笑，反應應該會相當激烈，所以亦有可能係卡斯拿斯發現自己玩大咗之後，先用「被Hack」黎打圓場。