無論你有冇拖拍、又滿唔滿意段關係，相信大家都會同意，「拍拖」比起「單身」一定會使多咗錢。不過美國一個房地產網站近日進行咗一個調查，發現原來美國人每年平均都要交7000美金，即約5.5萬港元嘅「單身稅」，換言之拍拖反而可以慳錢。唔知各位又會唔會因此而更踴躍尋找愛情？

美國房地產網站「Zillow」日前公佈咗一個調查，表示單單係租屋一項，美國單身人士每年平均就要畀近7000美元嘅「單身稅」，如果你住喺紐約市、甚至曼克頓等黃金地段，個單身稅更可以高達2.4萬美金 (近19萬港紙)。

其實Zillow嘅計法非常簡單，就係搵出所有地區中，一個一房單位嘅平均租金，再假設屋租本來可以由一對伴侶平均攤分，但你又因為各種原因維持單身，所以你就「額外畀多一半」，而呢半個月租再乘12個月，就係所謂嘅「單身稅」。條數雖然好簡單，但乘出黎個「稅款」就一啲都唔細。即使撇除天價租金嘅紐約市，住喺三藩市、聖荷西、聖地牙哥、波士頓、華盛頓以至西雅圖等大城市嘅單身稅，每年都超過一萬美金。就算係名單中「單身稅」最少嘅底特律及克利夫蘭，都要接近4,500美金。再考慮到夫婦可以共同報稅，可以慳嘅錢就更多。

圖片：Zillow

Zillow呢個研究，其實係想探討單身人士嘅生活成本，同時提出有個穩定伴侶、甚至結婚，係一個於現代社會更符合經濟效益嘅選擇。但佢哋同時亦認同，單身有住唔需要顧及另一半等好處，更重要嘅係大家知道自己想要啲咩，啲錢應該點使。

不過，呢個計法喺香港就未必啱用。先唔計兩個人同居嘅屋租係咪真係「平均攤分」，單身人士仲有個非常好嘅「逃稅方法」——繼續痴屋企住！所以單用「經濟效益」就未必可以服香港嘅單身人士於愛情上更加主動啦。

資料來源：Zillow