雖然日本整體黎講係一個好安全嘅國度，但當地嘅痴漢問題有時真係可以非常嚴重。好似近日本就發生咗一件非常誇張嘅痴漢案件，犯案者為咗偷窺——我都唔肯定仲算唔算「偷」啦——街上女性嘅內褲，竟然當街剪爛女方條裙。警方調查後仲發現犯人曾經犯過十宗類似事件，情況嚴重到日本網民都群起批評。

據日本媒體報導，於大阪梅田站附近嘅曽根崎警署日前以「刑事毀壞」罪名拘捕咗一個31歲嘅水管工人「武本弘明」，而其「毀壞」嘅，正正就係女性嘅裙。據知今年5月25日一名20代女性經大阪站返到屋企後，因為發現裙子後方被人剪爛而報警，到本月初日本警方於將犯人拘捕。而犯人亦承認當日係因為「想睇對方條內褲」而犯案，更表示自己平時就會於大阪站附近徘徊尋找「獵物」，被捕之前已經犯過另外十宗同類案件。日本警方呼籲其他受害者向警方報案。

雖然話案件本質只係「裝人底褲」，但由於犯人於人來人往嘅梅田站內犯案，而且係用剪刀剪開女性嘅裙，所以事件依然引起網民討論。有人認為正正就係呢啲害群之馬令日本男性地位降低，亦有人驚訝佢究竟係點樣剪爛人哋條裙又不被發現。個人認為最「中肯」嘅網民留言就係：「人哋都已經著裙你唔可以『裝』架咩？要用到剪？」

資料來源：讀賣新聞、5ch