Georg Jensen 貴為丹麥皇室嘅御用品牌，主要賣點就係高雅、簡約嘅設計風格。講起丹麥皇室，幾年前中堅賓 Lord Bendtner 同丹麥男爵 Caroline分手，上年Caroline 仲要申請禁令，唔俾 Lord Ben 見自己個仔，好慘。講返正題，Koppel Grande Date又係 BaselWorld 嘅發表作品，錶盤簡約得嚟非常之靚！

佢比較特別嘅地方係近12點位嘅大型日期顯示，個視窗用咗梯型設計，加上六點位一個小秒盤，同 Georg Jenson 個 Logo 串連成一條中軸，視覺上平衡舒服。

錶盤只有日期兩個數字，Georg Jenson 選用咗5分鐘間距嘅圓點，取代傳統數字刻度，細長纖幼嘅指針有效增加空間感，睇起嚟夠簡潔乾淨。

藍寶石水晶底蓋見到，Movement嘅Dubois Dépraz 14000 機芯，提供到42小時左右嘅動力儲存。

不鏽鋼款賣 HK$24,000，揀紅金就貴啲，HK$88,000。