Longines 一直視悠長歷史為品牌驕傲，深信優雅嘅設計可以跨越時代，復刻版嘅錶款以經典設計為藍本，再配搭先進技術、質料，以現代嘅角度重新演繹傳奇腕錶。今次講嘅5隻復刻都係入門級，價錢約一萬至二萬七，睇吓有無邊隻啱你心水啦！

一、LONGINES Conquest Heritage

1954年品牌於瑞士為Conquest系列註冊，以印證呢個系列嘅成功，復刻版仍然保留舊有錶盤上“Conquest”字樣。35mm 精鋼錶殼，以現代標準而言可能較細，搭載L633自動上鍊機械機芯，備有時、分、秒、日期顯示。錶盤有太陽放射飾紋，11個有SLN夜光塗層嘅金色小時刻度，面鏡為Hesalite 水晶玻璃。襯埋黑色短吻鱷魚皮帶，價錢 : HK$9,500。

二、LONGINES Legend Diver

1960年嘅潛水錶款，為Longines首隻潛水腕錶，復刻時保留咗主要功能同弧形錶鏡。42mm精鋼錶殼，同樣內置L633自動上鍊機械機芯。黑色錶盤上嘅6、9、12小時刻度有夜光塗層，具弧形藍寶石水晶錶鏡同旋入式錶背。其一錶冠可以用嚟調教內錶圈，等用家潛水時更容易計算剩餘嘅時間。黑色合成纖維錶帶，防水深度達300米，價錢 : HK$17,400。

三、LONGINES Avigation Oversize Crown

20年代飛行員腕錶，當年計時碼錶仍然非常罕有，飛行員就用腕錶上面，可雙向轉動錶圈上嘅凹凸紋去進行操作。復刻版41mm精鋼錶殼，配置L615自動上鍊機械機芯，具時、分、日期顯示，同6點位嘅小秒盤。圓形錶盤上有梨形鍍金夜光指針，小時刻度以羅馬數字顯示。防刮藍寶石水晶錶鏡，備多層防反光塗層，襯黑色鱷魚皮帶，價錢 : HK$27,300。

四、LONGINES Heritage Military COSD

藍本來自40年代英國特種部隊嘅軍錶，每個部件都有COSD (Combined Operations Stores Depot)，指二戰時期British War Office屬下嘅Combined Operations Command，當時深受傘兵歡迎。復刻成品配備40mm精鋼錶殼，配L619.2自動上鍊機械機芯，啞黑色錶盤3點位有日期顯示視窗，錶盤上半個箭頭原意為表示屬於英國政府財產，而家成為軍錶嘅標記。防刮藍寶石水晶錶鏡、多層防反光塗層，加埋黑色短吻鱷魚皮帶，價錢 : HK$15,600。

五、LONGINES Heritage 1973

寫明係1973年嘅經典系列，5隻為一一款採用枕形而非圓形錶殼嘅作品，70年代嘅優雅風格透過錶盤佈局演繹得相當精彩。40mm精鋼錶殼，自家L688自動上鍊導柱輪計時機芯；白色錶盤於4點半位有個日期顯示，右邊係30分鐘累計時盤、12小時累計時盤位於下方，最後左邊先係小秒盤。小時刻度有黑色細線做裝飾，附設夜光塗層圓點。防刮藍寶石水晶錶鏡，透明錶背，襯黑色鱷魚皮帶，價錢 : HK$25,700。