唔少人都鍾意睇科幻片，睇得多，有時會不自覺憧憬裡面充滿未來感嘅場景，例如有懸浮螢幕嘅指揮室，又或者係全白色嘅囚室。如果巴打你都追求呢種科幻場景，咁京都呢個全白膠囊旅館「9h nine hours」一定啱你心水！

最近來自京都嘅膠囊旅館「9h nine hours」喺Twitter上引起話題，本來以為全白設計會畀人感覺平平無奇，冇咩討論價值，但誰不知一位入住過「9h nine hours」嘅網友喺Twitter上出Post大讚「9h nine hours」勁正！可能佢本身喜歡科幻感設計，一見到「9h nine hours」全白簡約嘅裝潢，就覺得呢個地方瀰漫住會被人用號碼代稱嘅氣氛，就好似自己都係科幻電影入面嘅一員感，呢種氣氛令佢相當興奮！

就咁睇相可以見到，「9h nine hours」膠囊旅館9成嘅嘢都係白色，幾乎冇用文字去說明，只有數字搭配圖形去表明不同設備。雖然呢間旅館膠囊旅館2009年已經開幕，到而家都有成十年時間，但仍然有好多人討論，皆因佢嘅設計太有特色，更有唔少網民話，感覺瞓到一半會畀人捉去做實驗之類，對於嚮往科幻電影嘅人而言，呢間膠囊旅館絕對係下次遊日嘅不二之選！