網上直播越黎越流行，市面上亦越黎越多直播平台，Facebook、Youtube、Twitch，甚至手機上嘅直播APP、中國嘅直播平台，隨口數都有10個8個。每個平台都有各自嘅優劣，亦有各自嘅規章去限制直播主及觀眾嘅言行。而今日要介紹嘅呢位台灣直播主「吃貨夜雨」，就曾經因為「分享或參與性暗示內容或性行為」而被Ban台三日！但佢實際上做咗啲咩？就係直播期間食棉花糖！

是咁的，吃貨夜雨平時會喺Twitch上打下《英雄聯盟》，咁叫得「吃貨」一路打一路食下嘢都好合理，上年年尾佢就用竹籤串起幾粒棉花糖，再用火槍燒，一路打機一路「妹下妹下」咁，結果唔知係有人投訴，定Twitch嘅系統覺得佢咁樣有性暗示，結果就被人Ban咗啦！

係，我承認以佢喺IG上Show嘅身材樣貌，拎住條嘢喺到「妹」仲有痴到個咀都係白色，確實係幾令人有遐想，但講真佢食棉花糖嗰陣只係著住件普通T Shirt，連肉色部份都唔多見，咁都算係性暗示個標準又高咗啲喎？定應該正面啲諗，Twitch係官方認證咗吃貨夜雨就咁坐喺到就已經性感到算係性暗示呢？

firefly880605 on Instagram