細細個讀書時，我哋就已經學緊咩「因為醫療技術進步，人類壽命穩步提升」，早幾年甚至有唔少學者估計人類將會進入「百歲時代」，即平均年齡會高達100歲。不過根據世衛（WHO）上週最新發表、每隔兩年做一次嘅人類預期壽命報告，過去兩年全球人類預期壽命不升反跌，倒退回10年前嘅水平，而箇中原因，就係因為過去幾年嘅疫情。

WHO上週發表2023年嘅全球人類壽命報告，最新數字顯示，全球人類預期壽命由2021年嘅73.2年，下跌1.8年至71.4年，正正就係2012年嘅數字。同一報告公佈嘅全球人類嘅期望健康年數，亦同樣下跌1.5年至61.9年，剛巧又回到2012年嘅水平。報告中WHO就明確指出，Covid-19疫情係令兩個數字下跌嘅主因。

值得留意嘅係，WHO公佈嘅數字，比起早前醫學期刊《柳葉刀（Lancet）》公佈嘅更差。當時《Lancet》估計人類預計壽命會下跌1.6年。《Lancet》報告亦指出，單單係2020至2021年嘅疫情，就已經直接或間接（疫情打亂醫療系統導致失救）令1590萬人死亡。

WHO就表示，雖然疫情影響全球人類，但對不同地區嘅影響有明顯差異。例如2021至2023年間，西大平洋地區人口嘅預期壽命只係跌咗0.1年，幾乎可以話係不受影響；但美洲及東南亞地區人口嘅預期壽命就大跌3年，係受最嚴重影響嘅地區。

資料來源：AFP BB News