{ SKIP }
文:MenClub 波特先生  圖:互聯網
POSTED ON 26 Dec 2017

如果要數最偉大嘅意大利球員,唔知你第一時間會諗起邊個呢?馬甸尼?保方?索夫?托迪?定還是係佢呢 - 「神奇小馬尾」巴治奧(Roberto Baggio)。

巴治奧現年50歲,係FIFA100入面其中一位意大利球員(意大利一共有14位入選球員),而喺1999年評選出黎嘅20世紀最偉大100名球員入面,巴治奧排名第16位,係意大利球員當中排名最高的,可見佢對於意大利足球黎講幾有代表性。
 
不過作為意大利球迷嘅你可能對巴治奧又愛又恨,因為喺1994年世界盃入面,喺巴治奧神勇嘅表現下,意軍成功殺入決賽,並與巴西大戰120分鐘後未有敗陣下來,但可惜嘅係喺12碼大戰入面,巴治奧主罰關鍵嘅一球竟然一飛沖天,最終意大利無奈飲恨。確實巴治奧射失呢個12碼係直接令意軍落敗,但係其實喺佢射最後一輪呢一球之前意軍已經有兩名球員射失,所以當時意軍正以2:3落後,就算巴治奧成功射入,亦難免巴西嘅最後一球亦可以射入棒盃。
對於巴治奧黎講,呢個12碼應該係佢球員生涯入面最大嘅其中一個遺憾,但無遺憾又點算得上真正嘅人生呢?1967年,巴治奧喺意大利卡爾多尼奧市出生,其後7歲佢已經進入當地球會Caldogno開始接受青訓,而呢段期間嘅巴治奧已經展現出出色嘅天賦,佢喺26場比賽入面攻入45球,並交出20次助攻,其中包括一場比賽曾攻入6球,最終被球探成功發掘。就係咁,巴治奧就被維琴索以300鎊簽走,當時嘅佢只有13歲。

加入維琴察青訓後,巴治奧表現繼續難以阻擋,佢喺120場比賽入面攻入110,最終被球隊破格提拔上一隊,當時嘅佢只有15歲,而維琴寫則係一支喺意丙聯賽嘅球隊。喺1984-85球季,巴治奧已經成為球隊嘅正選,佢喺上陣29場聯賽入面攻入12球,從而引黎意界球隊嘅關注,最終費倫天拿決定將佢簽入。可惜嘅係就喺轉會費倫天拿前嘅兩日,巴治奧喺一場比賽出現嚴重受傷,呢次受傷嘅嚴重程度甚至認為佢可能以後都踢唔到波,但係費倫天拿仍然完成轉會,轉會費為150萬鎊,其後球隊全力為巴治奧安排進行手術嘅事宜。

喺加盟費倫天拿頭兩季,巴治奧都因傷大部份時間都未能夠上陣,直到1987-88球季佢先真正有一個較為健康嘅賽季,全季佢上陣左34場比賽攻入9球。而1988-89球季,則黎到巴治奧喺費倫天拿嘅巔峰,佢全季上陣41場攻入24球,表現出色下成為球隊們嘅寵兒。
 
1990年,費倫天拿將巴治奧賣到祖雲達斯,轉會費為當時破足球轉會紀錄嘅800萬鎊,而佢亦被祖記委以重任穿起10號球衣。對於巴治奧離隊,費倫天拿嘅球迷難以接受,對此巴治奧曾公開表示當時自己係被迫離隊的。

加盟祖記後,巴治奧更多以進攻中場上陣,但係佢嘅入球能力卻仍然非常出色,喺效力祖記5個球季入面,佢有4個球季都可以攻入至少20個入球,其中包括有一個球季更攻入30球。而喺1994-95球季,祖記換上新教練納比,佢決心令球隊唔再單靠巴治奧一人,再加上巴治奧整季亦有傷在身,所以巴治奧嘅角色亦越黎越唔重要。諷刺嘅係,就係呢一季祖記成功奪得意甲冠軍及意大利盃冠軍,而球隊管理層因此決定將巴治奧剔出球隊未來計劃當中,以迪比亞路作為球隊未來10號人選。
 
對於祖記嘅決定,巴治奧亦只可以接受,最終佢以680萬鎊轉投AC米蘭。加盟米蘭初期,巴治奧仍然有傷在身,但當佢處理好傷患後就重新加入球隊正選陣容,並助球隊喺1995-96球季成功奪得意甲冠軍,可謂對自己嘅老東家祖雲達斯吐左一口烏氣。

可惜嘅係,巴治奧再一次被球隊教練卡比路認為唔喺計劃之內,所以呢位「神奇小馬尾」被迫再一次離隊他投,而今次他就加盟左博洛尼亞。黎到博洛尼亞,巴治奧再次成為球隊核心,並且再次向球迷展示佢嘅入球能力。全季落黎巴治奧喺聯賽攻入22球,最終助球隊排名聯賽第8,比放棄佢嘅米蘭(第10位)排名更高。

由於岩岩一季表現出色,再加上喺98世界盃嘅表現,巴治奧成功同兒時最愛球隊國際米蘭簽約,但呢個決定卻令人失望,因為佢並未能獲得足夠嘅上陣時間,就算能夠上陣亦可能會被安排出任唔擅長嘅位置,好似翼鋒咁。最終,巴治奧喺國米效力兩年時間上陣59場比賽只係攻入17個入球,表現令人失望。

由於未能喺國米適應,當時33歲嘅巴治奧決定唔同球隊續約,最終以自由身加盟升班馬布雷西亞。而喺巴治奧首季加盟帶領下,布雷西亞表現出色,成功奪得聯賽第8位。雖然之後布雷西亞未能奪得任何獎盃,但係巴治奧喺效力4個球季期間都繼續保持雙位數嘅入球,直至2003-04球季完結,巴治奧正式決定掛靴。

而喺國家隊方面,佢喺1988年加入成為大國腳行列,並喺1999年結束國家隊生涯,期間一共上陣55場攻入27球。喺2004年,巴治奧喺球迷強烈嘅要求下,成功喺一場國家隊熱身賽入面再次披上意大利10號球衣上陣,並且成為球隊嘅隊長,但最終佢未能夠取得任何入球,而呢一場亦都佢生涯最後一場國家隊賽事。
個人榮譽方面,巴治奧喺1993年曾奪得世界最佳前鋒一獎,而同年佢則成為金球獎第二名。另外,由於其傳奇嘅生涯,巴治奧分別被費倫天拿、祖雲達斯及AC米蘭評選為歷史最佳11人、球隊傳奇50人及名人堂成員。

巴治奧喺場上雖然喺組織者,但係佢總係可以有佢嘅方法取得入球,而佢嘅視野、創造力及傳球能力都係首屈一指的,就係因為咁所以佢被部份人稱為「9號半」球員,亦即係同時兼具9號球員嘅入球能力及10號球員嘅創造力。

退役後,巴治奧被意大利國家隊委以重任,就係為球隊處理國家隊後備嘅選拔及培養,以發掘出新一班可以代表意大利嘅國腳。
 
喺生涯入面,巴治奧經歷過光輝嘅時刻,佢帶領意大利殺入世界盃決賽,但同時佢亦都經歷過失敗,被認定為未能奪得世界盃嘅罪人。而正正就係有呢啲錯失,巴治奧先建構出佢呢個不平凡嘅傳奇生涯,先會咁吸引球迷們嘅注視。

因為「掌摑事件」而沉寂咗一排嘅Will Smith,今年夏天將聯同老拍檔Martin Lawrence再次回歸大銀幕,繼續搞笑互相鬥嘴。 經典動作喜劇《Bad Boys(重案夢幻組)》最新續集《Bad Boys: Ride or Die(重案 ...
hobby
【影視】Will Smith沉寂兩年回歸!《Bad Boys 4 重案夢幻重組再重組》公開首部預告
28 Mar 2024
冇Johnny Depp嘅《魔盜王》仲能唔能夠吸引觀眾入場呢?
hobby
【影視】《魔盜王》系列確定重啟!監製:我們不需等待某些演員回歸
27 Mar 2024