奧斯爾瘋狂5分鐘，阿仙奴收下5：0大勝！

文：MenClub 波特先生　　圖：互聯網
POSTED ON 30 Nov 2017

阿仙奴今季有少少一反常態，賽季表現竟然低開高走，近期6場聯賽取下5勝1負嘅戰績，其中包括岩岩尋晚大勝哈爾斯菲爾德5：0，而唯一一場輸波只係不敵榜首實力最強大嘅曼城。

講番尋晚對哈爾斯菲爾德場波，阿仙奴可以話打出今季最佳一戰，佢地全場控球率達到70％，射門以14：6完勝對手，其中7次射門中龍就入左5球，命中率可以話極高。

入球球員（入球時間）：拿卡錫迪 3’ 基奧特 68’ 山齊士 69’ 奧斯爾 72’ 基奧特 87’

今場阿仙奴能夠迎來一場大勝，當中最主要嘅係佢地嘅德國中場奧斯爾爆發，其中喺下半場68分鐘起嘅5分鐘，「奧燒」竟然球王上身一下子連續交出兩次絕妙助攻及自己攻入1球，令本來只係領先1球嘅阿仙奴完全鎖定勝局。

以上講到嘅瘋狂5分鐘，最精彩嘅可以話係第三個入球，亦即係山齊士個一球。阿仙奴憑住中場球員成功以頭搥截擊後，連續4次一腳波嘅傳送(包括截擊嘅頭搥)，最終由「奧燒」傳中比山齊士搞掂，絕對有當年兵工廠水銀瀉地嘅感覺。

贏左呢一場之後，阿仙奴暫以14場9勝1和4負嘅戰績，排名聯賽榜第4位，落後第三位嘅車路士1分，同榜首嘅曼城就相差12分。