《寵物小精靈》有唔少人氣角色，除咗比卡超、伊貝、傻鴨、車厘龜、小火龍、奇異種子之外，大大份又懶洋洋嘅卡比獸都係大熱小精靈之一，萌爆嘅卡比獸仲曾經出過唔少商品，當中以任天堂早幾年出嘅1.5米高卡比獸公仔最為經典！咁大隻卡比獸公仔係就係好得意，不過得個擺字又唔多實用，如果轉做梳化又點睇呢？

日本梳化廠商cellutane最近就出咗款「卡比獸梳化」，又大又軟嘅「卡比獸梳化」包你一坐落去就唔想起返身，cellutane仲好貼心出埋款精靈球踏座，可以畀你擺埋對腳上去舒舒服服咁伸展下。

不過大家唔好睇呢個「卡比獸梳化」大大份就以為佢好重好難搬開打掃，呢款梳化其中一個賣點就係輕，就算係女仔都好容易搬郁佢。

目前呢款「卡比獸梳化」售價約24800日元左右，如果鍾意嘅話可以上cellutane官網睇睇！