喺 Konami 宣布《PES 2020》獲得祖雲達斯獨家授權後，噚晚 EA Sports 就發布《FIFA 20》最新 Gameplay 預告，影片中展示咗《FIFA 20》最新嘅遊戲改進。一直有唔少玩家覺得12碼難射，而 Gameplay 最先就展示可以更精準選擇12碼及罰球目標嘅新系統，以及更真實嘅一對一物理引擎。《FIFA 20》將於9月28日登陸PS4、Xbox One、PC 及 Switch 平台。

今次《FIFA 20》喺死球系統方面應該會有大改進喇，Gameplay 中嘅12碼及罰球嘅射門目標以白色虛線圓圈顯示，比起《FIFA 19》以「箭咀」顯示嘅12碼更為精準，相信以後大家互相12碼可以玩得更刺激。

罰球方面，射門目標一樣有白色虛線圓圈顯示，不過仲加入咗更清晰嘅罰球教學指示，包括 Curl Shot (香蕉射球)、Dipping Shot (急墜射球)及 Knuckle Shot (落葉球射球)，大家嘅得分方法就可以有更多不同變化喇！

攻防方面，《FIFA 20》Gameplay 介紹咗 Dynamic 1v1s (動態攻防 1v1)，進攻上遊戲喺一對一對決上增加咗更多操控性，而防守上 A.I. 亦進行咗改進，喺轉守為攻上有更加真實一對一效果。另外，遊戲新嘅物理系統會影響球員由 First Touch 到射門嘅所有結果，包括足球旋轉、彈射及運動軌跡，令遊戲更真實。

《FIFA 20》將於9月28日登陸 PS4、Xbox One 及 PC 平台，而 Nintendo Switch 就會推出「Legacy Edition」版本，當中唔會加入「Voltea」街頭足球模式及新功能，只係對球員數據進行更新。