【影評完全不劇透】《白頭山：火山浩劫》劇情超有層次驚喜感動非一般災難片

踏入2020年第一部要推薦電影，我會毫不猶豫大推韓國非一般災難片《白頭山：火山浩劫》，呢套電影係近年最讓我驚喜的一部商業電影，最初以為只是火山爆發的災難片，睇落驚喜重重唔係咁簡單，劇情複雜多元相當有層次，感官震撼緊張刺激得嚟居然笑中有淚，肯定有一段戲過半場人眼濕濕，係大韓民族自強自主華麗體現。這套韓國電影，有動作、有特技、有災難、有政治，有軍事，有愛情、有親情，有笑點、有淚水，這麼有層次的電影，要入場睇！

根據資料顯示這是《與神同行》團隊斥資260億打造的年度壓軸動作災難片， 喺我入場之先我剩係接觸過以上一段句子。帶住 《與神同行》嘅好感同一張張熟悉的角色人物面孔，就此入場等住睇一部災難生死逃亡作。但入場十分鐘就發覺唔係個回事，地震火山爆發只係背景， 故事劇情相當厲害， 編劇應記一功， 遠遠超出一部災難片，這絕對係劇情片嘅典範， 商業大電影的教材。 

電影帶嚟嘅係一個非常深層次接二連三嘅驚喜， 你睇完出門口嘅時候感覺係呢個編劇編故事嘅能力相當強大，縱然過程確係有點誇張。 但係種種轉折位鋪排以至帶出來的訊息都非常深刻。入場前海報睇到演員一字排開， 陣容強大未睇前會諗， 呢種星光熠熠陣型演員走馬看花會唔會好似過去港產巨星大雜燴，但入場發覺每一位角色都擔當住唔同嘅責任同功能，成件事和勇相連絕不割蓆缺一不可，無論係前線勇武後勤絲打，粒粒巨星每一位缺一不可成就偉大誇張逆天奇事。導演用盡每一個角色，呢點都係個劇編得好成功營造。

其實我從來都唔鍾意睇打打殺殺緊張動作片， 如果你係好此道者此電影某程度上都合乎你嘅期望。但我更欣賞嘅呢部作品中嘅細膩中帶輕鬆，呢套作品的行進風格係自然地輕鬆搞笑，都係劇情編得好一班廢柴錯有錯著臨危受命，帶來十分搞笑的過程。卻不失緊湊高潮送起面對一關比一關難，原來對手係……(唔講得…自己睇)劇情有三到四個轉折位，原本以為單一嘅任務一波唔止三折，仲越玩越大驚喜處處。 就算要劇透都唔係三言兩語講得清楚， 這是一個複雜嘅故事呀。

好多中國人尢其稱為五毛好鍾意話唔好講政治，咩都話太政治化，而韓國經歷過一代一代的社運，到今日終於民主化，政治正好為電影業帶來創作的自由與土壤。呢部作品同樣睇到好多政治化國際化的元素，大韓民族的愛國主義係呢部電影深深表達，唔同的是愛國係一種超越政見跨越南北的民族性，大家要特別留意導演如何描劃唔同的政治勢力，係韓國人民對世界政局最貼民心的一種演繹法。唔係硬生教你愛一個政權，而係民族自強的感嘆對抗不同霸權逆權抗爭，狹窄長篷裏自強尋找生存空間。

最後再講一講從前我好憎韓國片，尤其係懶係催人熱淚， 男女主角其中一個唔係盲就係生cancer的愛情片。不過有一種感動，係自然而深深藏於每一個人嘅心裏面， 電影中後段有幾場戲真係催人熱淚，相當感動。爆個結局你聽，「最後無事」。 散場一刻感覺相當豐富，一下子次經歷甜酸苦辣臨離開戲院我對身邊嘅人笑笑講，唯一唔掂嘅地方係真係誇張咗少少囉！ 我望一望身邊人， 腦海中止住感動想起嘅係珍惜眼前人！

預告：

《白頭山：火山浩劫》(Ashfall) 製作特輯

導演 :李海準, 金丙書

演員 :李炳憲, 河正宇, 馬東石, 秀智, 田慧振

片長 :2小時8分

級別 :IIA 級

語言 :韓語 (中英文字幕)

上映 :24.12.2019 (優先場)       

        1.1.2020 (公映)

位於北韓與中國交界的活火山──白頭山無預警底下發生爆發，地質學家(馬東石 飾)揚言白頭山下的四個岩漿房將逐一爆炸，這次爆發將會殲滅南北韓，威力前所未見！為了解除末日危機，北韓大使館秘書長(李炳憲 飾)以及南韓EOD（爆裂物處理）隊員(河正宇 飾)與時候競賽，與地質學家團隊雙線發展，共同展開悍戰活火山任務，究竟南北韓迎來的是平安過渡，還是一場史無前例的大災難？