近年最熱門嘅動漫，當數早前完成漫畫連載嘅《鬼滅之刃》，但實在佢又有幾熱門呢？日本Oricon公佈2020年上半年公類書籍銷售排名，《鬼滅之刃》就包辦漫畫榜頭19名、漫畫作品榜第一名、甚至連「BOOK」榜第一都係佢！

Oricon公佈上半年漫畫銷售榜頭25名，其中《鬼滅之刃》第1至19期包辦頭19名，就連5月13日先出嘅第20期及第20期特典版都進佔第22及24位，換言之頭25名得4本唔係《鬼滅之刃》，分別係《One Piece》第95及96期、《進擊的巨人》第30期，及《王者天下》第56期。

分期銷售數字都已經係咁，以作品總銷量黎計就更加誇張，上半年《鬼滅之刃》賣咗超過4500萬本，比第二名嘅《One Piece》488萬本多出將近十倍，甚至比起作品頭十名其餘九名加埋都仲要多。另外《鬼滅之刃》嘅兩本小說亦成為「Book」榜頭兩名，令其成為Oricon史上第一部作品同時奪得漫畫及Book第一名嘅作品。

事後孔明咁睇，作者「吾峠呼世晴」能夠於呢個銷售數字下堅持完結《鬼》，都真係算急流勇退。縱然個結局唔算完美，但起碼都算善終吧？