對香港大部份機迷黎講，PS5呢就買硬架啦，差在係幾時買咁解嘅啫。而呢個「幾時」嘅問題除咗要睇佢幾時開售、大家幾時有錢，更重要嘅係睇佢到時夠唔夠貨。而如果你想確保自己可以第一時間買到部PS5嘅話呢，就可以去PS5嘅美國官網登記預購資格。

圖片：Playstation.com

個玩法係咁嘅，話說Sony即將會於美國開放少量預購，而要得到呢個預購資格，你就要去美國PS官網嘅相關頁面，入返你嘅PSN使用者名稱，Sony根據你「過去嘅意向及Playstation活動」黎到決定你有冇資格，如果你合資格呢，就會於大眾預售前收到有限時嘅電郵，於限時內利用電郵內嘅連結就可以率先預購PS5。而身在香港嘅用家都可以嘗試登記，只要你有個美國收貨地址 (大家有方法架啦) 就得架啦！

要留意嘅係，即使合資格，每人最多都只可以買一部PS5主機 (光碟版或下載版)、兩個DualSense手掣、兩個手掣叉電座、2個無線耳機、2個遙控同2個高清鏡頭，有少冇多。而且唔係收到Email就一定買到，最後都係先到先得。如果登記完冇收到Email呢，就即係Sony話你冇資格預購啦。