大家琴日睇PS5發佈會就會見到會出一隻《Harry Potter》為主題嘅開放世界遊戲《Hogwarts Legacy》，以系列小說、電影嘅吸引力，再加上睇落都唔錯嘅畫面、遊戲性，至少可以肯定《Hogwarts Legacy》於歐美應該會大受歡迎，相信Warner Bros. 對隻Game應該都寄予厚望——厚到佢會主動走出黎同大家講：「JK羅琳冇份參與隻Game嘅製作架！」

早幾日為大家報導過，JK羅琳因為針對跨性別族群嘅不當發言，被電影版演員紛紛割蓆、書迷高呼「羅琳已死」，基本上已經係神憎鬼厭嘅程度。甚至Warner Bros. 於《Hogwarts Legacy》嘅官方Q&A頁面中，都特登有一條係「JK羅琳對遊戲參與度有幾多？係咪佢寫嘅新故事？」然後自己答返「佢就冇直到參與嘅，亦唔係佢寫嘅新故事，只係佢之前嘅作品為所有《Harry Potter》衍生作定下基礎。」擺到明就係想避免Fans杯葛埋隻Game。

截圖：wbgamessupport

但，由於羅琳始終係系列創作者，幾乎可以肯定會收到《Hogwarts Leagacy》、或未來其他任何《Harry Potter》衍生作嘅分成，所以被割蓆還被割蓆，錢佢應該就係照收。