由於疫情重創當地經濟，日本政府早前就撥出4.5兆日圓「地方創生臨時交付金」，補助各地方政府振興經濟同加強防疫。不過石川縣能登町就選擇用2,700萬日圓（約192萬港幣）起咗一座大型「魷魚雕像」吸引遊客，隨即惹嚟民眾炮轟晒錢。

據了解，呢座「魷魚雕像」由纖維強化塑膠（FPR）製成，防水又防沐浴露，長13米、闊9米、高4米。雕像中間有個窿，可以畀遊客走入去打卡影相，效果就好似喺隻魷魚個嘴噴出嚟咁樣。

根據當地政府所講，魷魚係能登町特產，希望用呢座雕像作為地標，吸引更多遊客嚟參觀，有長遠嘅考慮。而且目前《Guardian》、《BBC》，以及多間外媒有報導「魷魚雕像」一事，反映雕像宣傳效果相當成功。不過大部份民眾就唔多認同政府睇法，覺得整嚟完全係晒錢。持中立態度嘅市民就認為，長遠嚟講雕像確實有增加遊客作用，但呢筆錢應該用喺醫療、防疫，呢啲最迫切嘅問題上。