過去兩年疫情期間，唔少電影都因為防疫又或有人確診而需要停拍，只有少數電影如Tom Cruise主演嘅《Mission: Impossible 7 (MI7)》堅持拍攝，去年尾Tom Cruise更被錄到於片場爆粗怒罵工作人員企得太近違反防疫指引，話再見到就會炒_咗佢。不幸嘅係，近日《MI7》劇組就傳出有工作人員確診，唔知Tom Cruise嘅反應係點呢？

圖片：IMDB

據《The Hollywood Reporter》引述知情人士指，目前於英國進行拍攝嘅《MI7》劇組中，有至少一名工作人員嘅肺炎檢測結果呈陽性，確診人員需要自我隔離14日，劇組亦隨即停工。劇組隨後亦發出聲明確認於例行檢查中發現有員工確診，並會停拍到6月14日。劇組於聲明中亦強調跟足一切安全指引，並會繼續監察事態發展。

圖片：IMDB

去年12月時，流出咗一段聲稱係Tom Cruise於《MI7》爆粗怒罵工作人員嘅錄音，Tom Cruise當時指整個業界都睇住《MI7》劇組能否於疫情上正常開工，佢哋嘅表現影響緊千千萬萬人份工。Tom Cruise當時仲話如果再見到劇組人員違反防疫指引就會炒咗佢。依家直頭有人確診，唔知佢係咩反應呢？

《MI7》原定於去年2月開始拍攝，但因為疫情而多次延期、暫停，上映日期亦由今年7月23日，兩次延期到下年5月27日。

資料來源：The Hollywood Reporter