講起前度，有人認為大家只能做「「最熟悉的陌生人」，但亦有人認為「分手亦可以做朋友」，我甚至識得有人喺分手十幾年、拍多好幾次拖，都仲會久唔久約當年嘅前度食飯。好多人一聽到後面呢個情況，就會覺得佢哋係餘情未了藕斷絲連，但2016年嘅一個研究就發現，「與前度做朋友」主要有七大理由，而且仲同你係咪有「黑間人格」特質有關。

美國奧克蘭大學心理學系教授Justin K. Mogilski及Lisa L.M. Welling於2016年做咗一個研究，要求300位成年大學生列出「與前度繼續做朋友的潛在理由」，結果發現收集到嘅超過2000個理由，其實都可以歸納為7個，包括「依賴及情感」，例如覺得對方最了解自己；「實用主義」，例如貪圖前度送嘅禮物，或者想透過前度去識佢其他朋友；「真正嘅餘情未了」，呢個相信唔使解釋；「分享孩子或資源」，即係大家有細路，或者一齊搞咗檔生意而必須有聯絡；「消退的浪漫」，例如係因為對對方失去性衝動而分手；「維持社交關係」，即係你同前度有同一班朋友，冇理由搞到面左左；以及「性相關」，即係同對方保留肉體關係，又或者懷念同對方嘅性關係。

而研究嘅下一步，就係要求另一班大學生為上述七個理由嘅重要性排序，結果發現「依賴及情感」先係最重要嘅原因，而「實用主義」就係最唔重要嘅原因。但研究同時發現，男性受訪者會更傾向因為「實用主義」及「性相關」而與前度成為朋友。

更重要嘅係，研究同時發現，受訪者嘅性格會影響佢選擇與前度成為朋友嘅原因。例如好顯然易見地，比較冇安全感或者焦慮嘅人，會更傾向「依賴及情感」等原因；而擁有「黑暗人格」特質，例如鍾意操控別人、缺乏同理心嘅，就會更傾向「實用主義」及「性相關」。另一方面，與前度有小朋友或者共同朋友，實際上係非常合理嘅理由。所以「與前度繼續做朋友」並非一定係壞事，更重要嘅係因為乜嘢理由，以及理由背後顯出嘅性格。