近日成都舉行為期三日嘅第九屆中國網絡視聽大會，本身呢啲會議都冇乜嘢嘅，主要畀班科技公司高層去講下自己公司有幾威，交換卡片識下人。點知騰訊高層孫忠懷就爆出一套「豬餿論」，批評時下洗腦低智短片就似「豬餿」，拉低晒成代人智商同審美標準，傻仔先會喺公眾場合睇呢啲片。雖然佢就冇指明邊間公司，但字節跳動（抖音母公司）副總李亮就嬲豬對號入座喺微博出文回應。

綜合中國媒體報導，孫忠懷喺會上表示「繁華市場背後有唔少低俗糟粕、博取關注嘅短片內容，呢啲片廣泛傳播消耗用戶大量時間。呢啲內容都有一個共同點，就係簡單、洗腦式嘅重複，潛移默化咁衝擊用戶觀念、拉低用戶心智，尤其係對心智未成熟嘅少年造成不良影響。」

之後佢再補充「唔知大家有冇喺火車站、飛機站、地鐵等公眾場合留意身邊嘅人，反正我就見過好多人拎著部電話，唔戴耳機開著喇叭，好似傻仔咁睇嗰啲特別洗腦嘅短片。呢種反智嘅娛樂消費品，真係迅速將一代人審美標準拉低，同時呢啲片能夠海量咁持續輸出，亦反映出審查及監管有好大壓力。因為演算法太勁，只要你鍾意『豬餿』 ，所有睇到嘅片都會變成『豬餿』，再冇其他片。」

雖然孫忠懷就冇指明邊一間公司有咁多低質短片，但呢番「豬餿論」就引起字節跳動（抖音母公司）副總李亮不滿，隨即喺微博表示「我諗呢位高層應該唔知道，號稱有數億用戶嘅微信視頻號，係目前唯一一個未有『未成年模式』嘅短片平台」之後就開始慢慢數騰訊近年點樣講一套做一套，抹黑短片行業低智同時，自己又大力發展短片平台。

事實上，就算有「未成年模式」，都只會過濾有黃色及暴力元素嘅片，低智嘅洗腦片依然會出到街，小朋友用家都可以繼續食「豬餿」。如果兩位高層有心提升返國人嘅審美水平，與其喺到隔空開火，不如諗下點解大家會鍾意食「豬餿」，同埋有咩計仔可以解決。