比起各種流線型超跑，唔少男士都希望擁有一部粗獷方正嘅越野車，而Mercedes-Benz G-Class系列更係無數男人嘅夢想。最近有位越南Youtuber就用木頭製作出「Mercedes-AMG G63」模型，除咗外型同內籠細節充分還原之外，部車仲可以郁！

呢位名為「Woodworking Art」嘅Youtuber，用唔同顏色嘅福建柏木（Fujian cypress ），一刀又一刀咁雕琢出汽車各部份組件。無論車門內則，座椅，輪圈，引擎都做得超精細，一啲都唔馬虎。底盤部份更用上彈弓同螺絲製作懸掛系統，直頭當佢係部真越野車咁整。唯一美中不足嘅係部車只係模型，冇得好似電動遙控車咁拎出街「遊車河」，但作者就實測過部車確實可以爬坡翻山越嶺。

其實呢位Youtuber之前都整過唔少木製汽車模型，例如Toyota Fortuner Legender 2021、1959 Classic Cadillac Convertible、2021 Lexus GX 460等等，售價大約758-1,137英鎊不等（約81,00~12,100港幣）。不過就暫時未知呢部木製AMG G63會幾錢，應該都係同之前嘅作品差唔多價。