日本環球影城 (USJ) 曾經推出過唔少以著名動漫為主題嘅遊樂設施，不過絕大部份其實都係用投影或VR技術，配合過山車或活動座椅等營造出真實感。不過明年USJ就會推出首個「行得走得」嘅VR設施，而且首個主題就係Capcom嘅《Monster Hunter World》，亦即係話大家可以靠自己嘅手腳去屠龍！

呢個將於明年1月推出，玩到8月尾嘅新設施名叫《Monster Hunter World: Iceborne XR Walk》，XR Walk其實係USJ新技術嘅名稱，簡單黎講就係玩家真係透過步行、揮動雙手等動作操控人物。而該設施嘅首個主題就係《MH: Iceborne》，據報玩家能夠憑真人活動控制遊戲角色於雪原上搵魔物蹤跡、攀山涉水，再用自行選擇嘅武器屠龍，配合埋風、熱力等體感，等大家有置身「芒亨」世界一樣。而USJ方面就透露，《Iceborne》嘅封面魔物冰呪龍會於遊戲中現身。

放得喺USJ、面對得所有遊客，可以想像呢個XR Walk一定唔會有遊戲本體咁具挑戰性，但據報遊戲嘅重點唔係「屠唔屠到條龍」，而係「你屠龍過程中拎幾多分」，令新舊玩家都可以經歷一次刺激嘅屠龍體驗。